Унгарските ракометари ќе бидат првите противници на македонските репрезентативци во втората фаза од 11.от собир на најдобрите европски селекции што се одржува во Данска. Овој натпревар од организатор е најавен за в сабота со почеток во 16 часот.
И другите две средби од втората групна фаза според распоредот објавен на официјалниот сајт на шампионатот, Македонија ќе ги игра од 16 часот. Во понеделник (20 јануари) противник на избраниците на Ивица Обрван ќе биде Исланд, додека во среда (22 јануари) македонската селекција ќе игра со Шпанија.
Ова е епилогот по одигрувањето на 3.коло во А групата каде настапуваше Македонија и средбите од групата Б со која меѓусебно вкрстуваат трите првопласирани селекции.
Резултати од 3.коло и табели во А и Б групата:
А група: Македонија – Австрија 22:21 и Данска – Чешка 33:29.
Табела: Данска 6 бодови, Македонија 3, Австрија 2, Чешка 1.
Б група: Шпанија – Исланд 33:28 и Унгарија – Норвешка 26:26.
Табела: Шпанија 6 бодови, Исланд 3, Унгарија 2, Норвешка 1.
Во новоформираната група Данска и Шпанија пренесуваат по 4 бода, Македонија 2, Исланд и Унгарија по 1 и Австрија 0.