Хрватска е последната репрезентација која обезбеди пласман во полуфиналето на Европското ракометно првенство што се одржува во Данска.
Во последниот натпревар од четврт-финалната група 2 одигран вечерва во Архус, ракометарите на Хрватска славеа победа со 31:28 во дуелот против Полска и го освоија второто место во оваа конкуренција, а со тоа и обезбедија место меѓу четирите најдобри селекции на шампионатот кои ќе разигруваат за медал.
Комплетни табели по завршувањето на втората (четвртфинална) фаза на првенството:
Група 1: Данска 10 бодови, Шпанија 8, Исланд 5, Унгарија 3, Македонија 2 и Австрија 2.
Група 2: Франција 8 бодови, Хрватска 8, Полска 6, Шведска 6, Русија 2 и Белорусија 0.
Утре е слободен ден на шампионатот, а веќе во петок на програмата се полуфиналните натпревари.
Во првиот од 18 часот и 30 минути ќе играат Франција и Шпанија, а во вториот од 21 часот Данска и Хрватска.
Во предигра на овие дуели од 16 часот ќе се игра натпреварот за 5.место на шампионатот меѓу Полска и Исланд.
Натпреварите за медал, односно 3.место и големото финале ќе се играат во недела.