Големиот успех со пласманот на Металург и на Вардар во четвртфиналето од Лигата на шампионите не остана незабележан ниту од Европската ракометна федерација (ЕХФ) која на својата веб страна вчерашниот ден го оцени како историски за македонскиот ракомет.
- Недела беше уште еден историски ден за македонскиот ракомет. За првпат две екипи се дел од четвртфиналето. Металург го елиминира Колдинг, а Вардар направи сензација против европскиот шампион Хамбург и го исполни сонот да влезе меѓу осумте најдобри, е коментарот посветен на успехот на македонските екипи.
ЕХФ пренесува и дел од изјавите на учесниците на дуелот Хамбург - Вардар.
„Најголемиот ден во мојата кариера“, вели Игор Карачиќ. „Сензационален резултат каков што никој не очекуваше“ додава Алекс Душебаев. „Нашата предност беше што бевме ослободени од било каков императив, а Хамбург имаше тежок меч во четвртокот. Можеби тоа беше одлучувачки“ е Владимир Петриќ.
Од ЕХФ ја потенцираат „тежината“ на успехот на Вардар поради тоа што македонскиот шампион настапи ослабен без најдобриот свој играч Тимур Дибиров, но и поради повредата на Стојанче Стоилов кој предвреме го заврши мечот во Хамбург.