Селекторот на македонската сениорска машка ракометна репрезентација Ивица Обрван по бараж натпреварот против Грција изминатиот викенд изјави дека победата е најважна кон остварување на целта. Пласман за СП во Катар следната година.
-Сакам да им честитам на моите играчи за победата, затоа што не е едноставно да успее во баражите. Задоволен сум од резултатот, но не и од играта затоа што знаеме дека можеме и подобро. Но, најважно е што победивме. Игравме на крајот на сезоната. Ракометарите се исцрпени и физички и психички но знам како селектор дека можеме и подобро во Скопје, изјави Обрван за Balkan Hanball.
И капитенот на македонската репрезентација, Кире Лазаров ја истакна важноста на победата но и тој призна дека не е задоволен од играта против Грција.
-Победата навистина е слатка. Затоа што тешко ја заработивме но и затоа што беше против Грција, земјата со која имаме долгогдишни проблеми. Не покажавме ниту 30 % од нашиот капацитет, но најважно е што победивме. Големите репрезентации победуваат и со лоша игра. Задоволни сме од триумфот и сега одиме на поголема победа на домашен терен пред нашата публика. Нашите навивачи се навикнати на успех и да гледаат добар ракомет, истакна Лазаров.
