Ниту Одбојкарската федерација на Македонија, ниту клубовите во машка и во женска конкуренција не знаат дали, кога и како ќе стартува новата одбојкарска сезона. На месец дена пред периодот во кој по некое непишано правило би требало да стартуваат првенствата сè е енигма.
Неофицијалните информациите велат дека се чека Федерацијата да достави апликации за пријавување учество во системот на натпреварување, чие дефинирање, пак, директно зависи од пријавените екипи. ОФМ засега молчи и најверојатно, чека реакција од клубовите, со оглед на тоа дека куса е листата на кандидати кои би играле следната сезона.
Во машка конкуренција Шкендија уште лани се повлече, а мали се шансите клубот да се врати на сцената, со оглед на тоа дека и самите потврдија дека е доволно од импровизации. Вардар никаде го нема. Струмица е единствената што покажува знаци на живот...
Во женска конкуренција Јанта Волеј и Македонија Макс се активни, шампионот Форца е пред расформирање, Работнички бара тренер, како и Бами Кор, а прашање е и дали и колку овие екипи и ќе пријават учество во таканаречената прва лига.
Се чини најсигурно е дека младински турнири ќе има бидејќи за нив и интересот е најголем, а за другото натпреварување ќе мора да почекаме, да видиме дали и колку храбри клубови ќе се огласат.