Машката ракометна репрезентација на Македонија утре против Швајцарија ги почнува квалификациите за Европското првенство 2016.
На денешната прес-конференција селекторот Ивица Обрван ја нагласи важноста со победа да се започне новиот циклус.
- Швајцарија има нов селектор и неколку нови играчи во однос на претходните квалификации. Добро е да се почне со победа и мирно да се подготвиме за дуелот по три дена со Чешка. Не се сите играчи во најдобра форма од икс причини, но ќе направиме се да постигнеме победа, рече Обрван.
Повратникот во националниот тим Наумче Мојсовски истакна дека победата е императив.
- Нашата амбиција е да се пласираме на Европското првенство во Полска и да го продолжиме континуитетот на настапи на европските собири. Во група Франција е огромен фаворит, а Швајцарија знае да биде незгоден противник, но моментално е ослабен и е без неколку играчи кои ја завршија репрезентативната кариера. Добро е циклусот да го почнеме со две победи, против Швајцарците и со Чешка, потенцира Мојсоски и додаде дека е потполно подготвен да му се стави на располагање на селекторот Обрван.
Оптимист е и пивотот Стојанче Стоилов.
- Ова ни е прв собир во оваа нова сезона. Швајцарија и Чешка се незгодни и квалитетни противници и со евентуални две победи со „една нога“ ќе бидеме пласирани на ЕП во Полска. Фаворити сме на утрешниот дуел, тоа мора да го покажеме на теренот.
Натпреварот Македонија – Швајцарија се игра утре со почеток во 17 часот и 45 минути во СЦ „Борис Трајковски“.