Ракометарите на Металург по втор пат за три дена се поразени од хрватската екипа ППД Загреб.
Откако во саботата металурзите загубија во дуелот од Лигата на шампиони, вчера попладне тимот од Автокоманда, е поразен од Загреб во меч од регионалната СЕХА лига.
Овој пат избраниците на Лино Червар, загубија од ППД Загреб со 23:20 во средбата од 15.коло, одиграна попладнево во СЦ „Борис Трајковски’’.
Уште по првото полувреме беше јасно дека подмладениот состав на Металург нема што да бара во дуелот со силната хрватска екипа која по 30-минути игра имаше предност од девет голови (5:14). Искусната гостинска екипа, рутинирано го одигра и вториот дел, па до десеттата победа во СЕХА конкуренцијата стигна со конечни 23:20.
Во победничката екипа најефикасен беше Стипе Мандалиниќ со 4 постигнати голови, а исто толку за македонскиот шампион постигна Марко Неловски.
Следен натпревар за тимот на Металург е гостувањето во Белорусија кај екипата на Мешков Брест на 1 март.
Вториот македонски претставник во СЕХА лигата, Вардар в четврток гостува кај Раднички, а во сабота (28 февруари) оди на мегдан кај Татран Прешов во Словачка.