Ракометарите на Вардар ја остварија четиринаесеттата победа во регионалната СЕХА лига.
На натпреварот од 17.коло, одигран попладнево во Прешов, Словачка, македонскиот вице-шампион забележа победа против Татран со 34:29.
Иако во првото полувреме домашниот тим имаше фуриозен почеток и предност од 6:0 по само 8-минути игра, сепак црвено-црните успеаја да ја наметнат својата игра и на паузата да заминат со нерешен резултат 12:12.
Во вториот дел по само 10-минути игра вардарци стигнаа и до 5 голови предност (20:15) кои рутинирано ги одржуваа за конечен триумф од 34:29.
Најефикасен во редовите на Вардар беше Добривоје Марковиќ со 8 голови, додека Стојанче Стоилов и Сергеј Горбок постигна по 6 гола.
Вториот македонски претставник во СЕХА лигата екипата на Металург утре гостува во Белорусија, кај Мешков Брест во дуел од 9.коло, кој ќе стартува во терминот од 17 часот.
За утре од 19 часот закажан е и дерби дуел, меѓу треторангираниот ППД Загреб и досега непоразениот Вестпрем.
Табела: Вестпрем 48 бода, Вардар 42, Загреб 30, Татран Прешов 30, Мешков Брест 27, Металург 15, Нексе 13, Војводина 10, Борац 7 и Раднички 7.