Праските во моментов се најактуелното овошје на пазарите, па денеска ви споделуваме еден интересен рецепт за тоа како да ги искористите и да уживате во нивниот вкус.
Потребни состојки:
За крцкаво путер тесто:
- 210 гр брашно
- 180 гр студен путер
- Прстофат сол
- 3 пакетчиња ванилин шеќер
- 2 лажици студена вода
За филот:
- 4-5 големи праски пресечени на мали парчиња
- 4 лажици џем од кајсии или праски
- 2 лажици брашно
- 1 лажичка цимет
- 1 пакетче ванилин шеќер
- 1 жолчка
- 1 лажица млеко
Начин на подготовка:
Во сад промешајте ги заедно брашното, солта, ванилата и путерот додека не добиете смеса со конзистенција на песок. Додајте ладна вода и оформете тесто. Обликувајте го тестото во форма на топка, обвиткајте го во хартија за печење и оставете да се стегне во ладилник околу 20-30 минути.
За тоа време, во длабок сад ставете ги праските ванилата, циметот и брашното. Добро промешајте и оставете на страна.
Оформете округла кора од тестото и премачкајте со џемот од кајсии или праска, нанесете од пресечените праски во средишниот дел на кората и започнете да ги превиткувате краевите за да ја оформите питата т.е. галетот.
Премачкајте со жолчка и млеко и печете во загреана рерна на 180 степени околу 25-35 минути додека не добие убава златно кафена боја. Сервирајте со топка сладолед или лесно изматен шлаг.
Добар апетит и забавно готвење! За повеќе рецепти посетете ја официјалната ФБ страна на Давор, Dave’s Kitchen.