Ново истражување покажува поврзаност на ултра-обработената храна со здравствените проблеми. Студијата ги следела навиките на луѓето во текот на 30 години и открила дека оние кои јаделе поголемо количество на ултра-обработена храна имале малку поголем ризик од смрт. Според истражувањето четири категории на храна се покажале како најголеми виновници.
![](http://images.idividi.com.mk/images/Blago13.jpg)
Во студијата, објавена во The BMJ, истражувачите анализирале податоци од 100.000 возрасни лица во САД без историја на рак, кардиоваскуларни болести или дијабетес. На секои четири години помеѓу 1986 и 2018 година, учесниците пополнувале детален прашалник за храна.
Податоците покажаа дека оние кои јаделе најмногу ултра-обработена храна - околу 7 порции дневно - имале 4% поголем ризик од смрт од која било причина, во споредба со учесниците кои јаделе најмала количина од околу 3 порции дневно.
Ултра-обработената храна вклучува „спакувани печива и грицки, газирани пијалоци, зашеќерени житарки и веќе готова храна што се затоплува. Таа храна најчесто содржи бои, емулгатори, ароми и други адитиви , богата е со енергија, дополнителен шеќер, заситени масти и сол, но не содржи витамини и влакна.
Храната со најсилна поврзаност со зголемена смртност, според студијата, вклучува:
· Готови производи од месо, живина и морска храна
· Зашеќерени пијалоци
· Десерти на база на млеко
· Високо обработена храна за појадок
Оваа студија доаѓа откако други истражувања објавени претходно оваа година покажаа дека диетите со висока содржина на ултра-обработена храна се поврзани со зголемен ризик од 32 штетни здравствени исходи, вклучително и поголем ризик за рак, големи заболувања на срцето и белите дробови, гастроинтестинални проблеми, дебелина, дијабетес тип 2, проблеми со спиењето, нарушувања на менталното здравје и рана смрт.