Софија, 12 април (МИА) - Сите летови на бугарскиот претседателски авион Ту-154 се откажани, по авионската несреќа во саботата кај рускиот град Смоленкс, во која загина полскиот претседател Лех Качински, соопштија денеска бугарски претставници.
- Бугарскиот Ту-154 нема да лета се додека сите причини за уривањето на полскиот авион не бидат познати, изјави началникот на воздухопловството Пенчо Пенчев за весникот „24 часа“.
Полскиот претседателски авион што во саботата се урна на западот на Русија со 96 патници и членови на екипажот, е идентичен со авионот на бугарскиот претседател Георги Прванов, кога станува збор за производителот и моделот на леталото.
Авионот од руско производство бугарските претставници го користат веќе 20 години. Вкупно четири вакви авиони се користат во Европа - еден во Бугарија, еден во Словачка и два во Полска.
Иако руските иследници ја исклучија можноста на технички дефект како причина за рушењето на полскиот авион, бугарските претставници разгледуваат натамошна употреба на Ту-154.