Приштина, 21 јули 2010 (МИА) - Меѓународниот суд на правдата, кој утре треба да се изјасни по иницијативата на Србија за оценување на легитимноста на независноста на Косово, има три опции, од кои две би биле во интерес на Приштина, а едно на Белград, се оценува во заедничката анализа на Центарот за европски студии на Универзитетот во белгискиот град Гент и на приштинскиот Институт за истражување.
Според авторите на анализата, првата опција е Судот да оцени дека прогласувањето на независноста на Косово била во согласност со меѓународното право, втората Трибуналот да не се изјасни по ова прашање со образложение дека во меѓународниот правен систем нема норми кои се однесуваат на прогласувањето независност, и третата да оцени дека косовската независност не е во согласност со меѓународното право.
Приштинските весници оценуваат дека доколку Судот се реши за една од првите две опции тоа би било позитивно за Приштина, додека третата би ги потврдила ставовите на Белград.
Сепак, според медиумите, дури и Судот да ја прогласи косовската независност за нелегитимна Приштина би можела да ја оспори таквата одлука со образложение дека Трибуналот не решавал за тоа дали постоењето на државата Косово не е во согласност со меѓународното право, ниту дека нејзините признавања се неважечки.
По повод утрешната одлука на Судот за Хаг денеска замина косовскиот министер за надворешни работи Скендер Хисени, кој утре ќе присуствува на објавувањето на мислењето на Меѓународниот суд на правдата.
Неговиот советник Ќерим Ќерими изјави дека Хисени е внимателен оптимист во врска со одлуката на Судот, додавајќи дека Приштина е подготвена за нови чекори во зависност од околностите што ќе се случат по утрешната судска одлука.