Белград, 8 декември 2010 (МИА) - Српската Влада донесе одлука да не присуствува на доделувањето на Нобеловата награда за мир на кинескиот дисидент Лиу Шијаобо, в петок, во Осло.
Српскиот министер за надворешни работи Вук Јеремиќ изјави дека Белград ги почитува човековите права, но и билатералните односи со Кина.
Известувачот од Европскиот парламент за Србија Јелко Кацин изјави дека е шокиран од одлуката на Србија да не присуствува на доделувањето на Нобеловата награда за мир на кинескиот дисидент Лиу Шијаобо.
- Нема ниту една земја кандидат за членство во ЕУ, или потенцијален кандидат, која на таков начин ја манифестира својата сервилност, изјави Кацин за Дојче Веле.
Тој оцени дека Србија „во својот однос кон прашањата за човековите права ја покажала својата начелна политика“.
- Има време за Кабила, а нема време за Осло и Нобеловата награда“, рече Кацин алудирајќи, веројатно, на минатогодишната посета на министерот за надворешни работи на Србија во Демократска Република Конго и неговата средба со претседателот на таа земја Жозеф Кабила. Известувачот на Европскиот парламент вели дека „тоа е доказ оти за српската надворешна политика е потребна вистинска дебата, не само во Србија туку и во ЕУ“ .
Кинескиот амбасадор во Белград Веи Џингуа рече дека Кина „високо ја цени“ оваа одлука на Србија. - Српскиот народ знае дека доделувањето Нобелова награда за мир на кинескиот дисидент нема врска со мир, оцени тој.
Србија е меѓу 19-те земји кои нема да присуствуваат на доделувањето на наградата. Освен Кина, на доделувањето нема да има претставник од Русија, Казахстан, Колумбија, Тунис, Саудиска Арабија, Пакистан, Ирак, Иран, Виетнам, Авганистан, Венецуела, Филипини, Египет, Судан, Украина, Куба и Мароко, наведе Нобеловиот комитет.