Приштина, 5 август 2011 (МИА) - Командантот на КФОР Ерхард Билер изјави денеска дека договорот за решавање на кризата на северот на Косово се уште не е постигнат, но дека „двете страни“ се близу решение.
Како што пренесоа приштинските медиуми, Билер рече дека „постојат предлози кои се разгледуваат во Приштина и во Белград“ и дека „двете страни се многу близу до конечен договор“.
Билер синоќа пет часа разговараше со претставници на српската Влада, а по средбата во базата на КФОР „Нотинг хил“ кај Лепосавиќ немаше изјави за медиумите, со што резултатот од разговорите не беше познат.
Претходно беше соопштено дека Србија и НАТО не успеале да постигнат договор за спорните гранични премини Брњак и Јариње и оти блокадите на северниот дел на Косово продолжуваат.
Приштинскиот весник „Зери“ денеска објави дека Владата на Косово поставила десет услови што КФОР треба да ги прифати и оствари во разговорите со претставниците на Белград за Владата да го поддржи договорот меѓу КФОР и Србија.
Премиерот на Косово Хашим Тачи во четвртокот, на седница на Владата, изјави дека командантот на КФОР генерал Ерхард Билер се согласил со овие барања.