Брисел, 29 ноември 2011 (МИА) - НАТО изрази загриженост за ситуацијата во северниот дел на Косово и ги повика сите страни на воздржаност и целосна соработка со меѓународниот фактор со цел да се обезбеди слобода на движење.
- Загрижени сме за развојот на настаните во северниот дел на Косово и внимателно ги следиме, изјави портпаролката на НАТО Оанa Лонгеску.
Во соопштението се повикуваат сите страни „без одложување“ да покажат воздржаност и воспостават соработка со претставниците на меѓународната заедница. - Целта на КФОР е да придонесе за одржување на безбедна и сигурна средина, слобода на движење и безбедност на Косово, во согласност со резолуцијата 1244, изјави Лонгеску.
Лонгеску истакна дека КФОР таа задача ја исполнува внимателно, фер и непристрасно.
- НАТО целосно ги поддржува командантите на КФОР во исполнување на тој мандат, нагласи таа.
Командата на КФОР претходно соопшти дека војници, откако се нашле под оган, на тој „криминален акт одговориле со средства без смртни последици“, како што се гумени куршуми, солзавец и водени топови.
Неколку десетици косовски Срби и 25 војници на КФОР се повредени во судирите кои и вчера избувнаа на барикадите во близина на селата Јагњеница и Зубин Поток.