Брисел, 21 јуни 2012 (МИА) - Албанија, Косово, Македонија и Црна Гора да обединат сили и да создадат нова трајна структура на соработка за да развиваат политички и економски односи и да го забрзаат влегувањето во ЕУ, се вели во текст публикуван на порталот EUobserver. ЕУ секој ден повикува државите од Балканот да ја подобрат регионалната соработка и да извршуваат реформи. Веруваме дека сега е време за промена и затоа предлагаме да се создаде структура слична на Бенелукс, во која ќе се збилажт Албанија, Косово, Македонија и Црна Ггора, посочуваат авторите.
Цел на создавањето на новата структура би требало пред се, да бидат трговијата и либерализацијата на границите, борба со организиран криминал, развој на регионот и инфраструктура и развој на финансискиот пазар, се вели во текстот.
Таква структура би дала нов поттик за подготовка за членство во ЕУ и би помогнала на тие држави да бидат конкурентни на европската економија, посочуваат авторите на статијата. Напоменуваат дека е многу важно да се убеди светската јавност дека не станува збор за обид за создавање „Велика Албанија“ на мала врата.
Би се создал пазар за осум милиони луѓе со слободен проток на стоки, услуги, капитал и луѓе што ќе биде од корист, наместо да се чека влез во ЕУ. Планот е амбициозен, но нема време за губење - на луѓето им треба причина за да останат во својата држава наместо да бараат среќа во странство, се додава во текстот. Авторите истакнуваат дека особено лоша е ситуацијата во Косово, бидејќи е најнеразвиено од тие четири држави.