Приштина, 14 април 2013 (МИА) - Косовскиот премиер Хашим Тачи ја отфрли денеска како несериозна можноста за продолжение на разговорите меѓу Белград и Приштина без посредник и нагласи дека се што Србија има да соопшти тоа треба да го стори со посредство на високиот претставник на Европската унија за надворешна политика и безбедност Кетрин Ештон.
- Адресата на посредникот беше Брисел, беше бароницата Ештон и Косово ќе го поддржи тој процес под нејзино раководство. Другите идеи немаат никаква валидност, не се сериозен пристап и се само дипломатски, политички маневар на Србија, рече Тачи.
Тој нагласи дека се што Белград има да и соопшти на Приштина, треба да го стори преку Брисел и Ештон.
- Ние ги поддржуваме сите релевантни фактори во Брисел и гаранциите на САД, нагласи Тачи и додаде дека откако Белград ја отфрлил предлог-спогодбата, сега се е во рацете на Ештон.