Примени три дози на вакцина против коронавирус овозможуваат 99,2 отсто заштита од смрт од Ковид-19 во споредба со невакцинираните луѓе, покажуваат податоците на Австрискиот институт за јавно здравје – Gesundheit Österreich GmbH (ГОГ).
Според институтот, ефикасноста по вакцинацијата со две дози е 92,6 отсто.
– Резултатот за Австрија е во согласност со другите меѓународни студии, изјави Лукас Рајнер од ГОГ.
Сепак, податоците главно се однесуваат на делта варијантата на Ковид-19. Што се однесува до сојот омикрон, сепак е потребно време за да се направат валидни проценки, објасни експертот.
Анализата го опфаќа периодот од почетокот на февруари 2021 година до 13 јануари годинава, а податоците за третите дози се вклучени од 1 октомври.
Во Австрија досега се потврдени околу 14.000 смртни случаи од коронавирусот, а меѓу нив биле околу 5.600 смртни случаи по првата серија вакцинација на почетокот на февруари 2021 година, од кои повеќето (околу 4.500 смртни случаи) не биле имунизирани.
Сепак, податоците од Австрија покажуваат дека 95 лица кои биле трипати вакцинирани починале од Ковид-19, од кои повеќето биле на возраст од 75 години или повеќе.