Љубљана, 19 ноември (МИА) - Во Словенија изминатата седмица бројот на заболени од новиот грип драстично се зголемил, соопшти Институтот за заштита на здравјето, предупредувајќи дека тој неповолен тренд ќе продолжи.
Во првата седмица од ноември имало 17,9 заболени на 100.000 жители, а во втората 76,7 заболени на 100.000 граѓани. Досега во Словенија лабораториски се потврдени 624 случаи на зараза со пандемискиот грип, а Институтот, во исто време, соопшти дека се зголемува бројот на сезонски заболени дишни органи.
Во Словенија вакцината против новиот грип ја примиле околу 20.000 лица, меѓу кои голем број здравствени работници и хронични болни.
Претставници тврдат дека кај вакцинираните немало несакани ефекти. Вакцината која се користи во Словенија веќе ја примиле над два милиони лица во Европа.
На Словенија досега и се испорачани 75.000 дози вакцини против новиот грип, а до крајот на годината треба да пристигнат уште 266.000.