Киев, 9 февруари (МИА) - Јулија Тимошенко одлучи да не ја признава победата на Виктор Јанукович на претседателските избори во Украина, соопшти ИТАР-ТАСС.
Таа тоа го изјавила на синоќешната седницата на парламентарната фракција на БЈУТ (Блокот на Јулија Тимошенко).
-Никогаш нема да ја признаам легитимноста на победата на Јанукович со вакви избори, изјавила таа и на своите правници им дала задача да се подготвуваат за судско обжалување на резултатите од гласањето.
Како една од варијантите таа споменала и свикување трет круг гласање.
На седницата на фракцијата заменик претседателот на парламентот Николај Томенко и дел од фракцијата на БЈУТ се изјасниле за признавање на победата на Јанукович и преминување на Тимошенко во опозиција, но мнозинството одлучило да се бори за судската победа на Тимошенко.
Пратеникот од БЈУТ Олег Лашко синоќа изјави дека Блокот на Јулија Тимошенко на суд и во изборните комисии ќе ги обжалува резултатите од изборите за претседател, што се одржаа на 7 февруари. Според него, во БЈУТ сметаат дека во Доњецката и Луганската област, како и во Крим, во корист на кандидатот на Партијата на регионите биле фалсификувани речиси еден милион гласачки ливчиња. Тој додаде дека БЈУТ сега собира материјали за нарушувањата на изборниот процес и со нив ќе се обратат на судот за нивно обжалување.
Според податоците на ЦИК од обработени 99,58 проценти од електронските протоколи од одделните изборни комисии Јанукович во вториот круг добил 48,83 проценти од гласовите, додека Тимошенко - 45,59 проценти, а 4,37 проценти не поддржале ниту еден кандидат.