Вашингтон/Париз, 12 февруари (МИА) - Претседателите на САД и на Франција, Барак Обама и Никола Саркози синоќа му ја честитаа победата на претседателските избори во Украина на лидерот на опозициската Партија на регионите, Виктор Јанукович.
Како што соопшти Белата куќа, во телефонски разговор со Јанукович, Обама му посакал успех во извршувањето на претседателската функција и ја поздравил „новата позитивна фаза во зацврстувањето на демократијата во Украина“.
- Претседателот (Обама) упати честитки и до Украинците за мирниот тек на изборите на 7 февруари. Мирното политичко изразување на волјата на украинските гласачи претставува позитивна фаза во зацврстувањето на демократијата во Украина, изјави портпаролот на Белата куќа, Роберт Гибс.
Тој нагласи дека САД со нетрпение очекуваат да почнат да соработуваат со новоизбраниот претседател и да ја засилат соработката со украинската Влада и парламентарните лидери.
Јанукович од своја страна изјавил дека партнерските односи меѓу САД и Украина се развиваат врз принципот на взаемна доверба и почитување.
Во честитката до Јанукович од шефот на француската држава Саркози се истакнува дека претседателските избори претставуваат „победа на демократијата“ во Украина.
- Украинскиот народ ја искажа својата волја на слободни, повеќепартиски и демократски избори, се наведува во писмената честитка на Саркози до Јанукович.
Јанукович победи на неделниот втор круг од претседателските избори во Украина, освојувајќи 48,95 проценти до гласовите, додека за неговиот противкандидат, актуелниот украински премиер Јулија Тимошенко, се изјасниле 45,47 отсто од Украинците што го искористија своето гласачко право. Останатите 5,58 отсто од гласовите се неважечки, соопшти вчера украинската Централна изборна комисија по обработувањето на 100 проценти од материјалите од избирачките места.