Брисел, 17 април 2010 (МИА) - Европската агенција за контрола на авиосообраќајот - Евроконтрол соопшти дека ситуацијата во европскиот авионски сообраќај денеска е полоша од вчера, поради тоа што огромен облак од пепел, кој се подигна во атмосферата после ерупцијата на вулкан во Исланд, се прошири над средна и северна Европа.
Поради тоа денеска не се очекуваат повеќе од 5.000 летови, иако нормално се реализираат околу 22 илјади, а наместо 300 прекуокеански авиони, кои обично во сабота пристигнуваат во Европа, утрово слетале само 73, додека вчера биле реализирани 10.400 наместо вообичаените 28.000 летови.
Иако во поголемиот број земји во северна и средна Европа не беше можно ни полетување ни слетување, летови се реализирани во јужна Европа - во Шпанија, на југот на Балканот, југот на Италија, во Бугарија, Грција и Турција.
„Според прогнозите, последиците од облакот вулкански пепел ќе се чувствуваат уште најмалку 24 часа“, соопшти Евроконтрол.