Гетеборг, 25 октомври 2010 (МИА) - Потрагата по стрелецот кој пука врз имигранти во шведскиот град Малме продолжува со несмален интензитет.
Сега по сторителот не трага само полицијата, туку и криминални групи, пишува “Свенска дагбладет“, посочувајќи дека извори во полицијата не ги потврдиле таквите податоци, јави дописникот на МИА од Гетеборг.
- Тој може само да се надева дека ние нема први да го најдеме, рече еден припадник на криминална група позната во јужна Шведска.
Шведската полиција се уште нема уапсено никого во врска со извршените серија неразјаснети истрели од огнено оружје, насочени кон лица со имигрантско потекло на подрачјето на Малме.
Полицијата ги предупреди граѓаните да бидат претпазливи доколку излегуваат сами навечер и во ноќните часови.
Досега годинава во јужна Шведска се регистрирани педесетина неразјаснети истрели, при што се верува дека зад атентатите стои едно или неколкумина мошне опасни лица.
Со оглед на тоа дека сите жртви, освен една, имале имигрантско потекло, полициската истрага, меѓу другото, е насочена кон екстремно десничарски групации.