Лондон, 11 декември 2010 (МИА) - Папата сакал муслиманска Турција да остане вон Европската унија, а ватикански дипломати лобирале врз венецуелскиот претседател Хуго Чавес и настојувале формулацијата „христијански корени“ на Европа да влезе во европскиот Устав, објави Гардијан кој продолжува да објавува информации од Викиликс.
Папата има одговорност за засиленото несогласување на Ватикан за идејата за влез на Турција во ЕУ, се тврди во тајни преписки од американската Амбасада во Ватикан.
Во 2004 година кардинал Рацингер рекол дека не може да се дозволи една муслиманска држава да биде дел од Унијата иако во тоа време Ватикан бил неутрален за прашањето. Американски дипломат навел дека Рацингер „јасно разбира дека ако се дозволи во ЕУ да влезе муслиманска држава, тогаш тоа ќе ја ослаби тезата за христијански корени на Европа“.
Сепак, Пјетро Паролин, в.д. министер за надворешни работи пред американски дипломати изјавил дека коментарите на Рацингер се негово сопствено убедување, а не на Ватикан.
Според документите на Викиликс Ватикан помогнал за ослободување на 15 британски морнари приведени во март 1997 година од Иран поради навлегување во територијални води. Во други дипломатски преписки се вели дека луѓето околу Бенедикт Шеснаесетти не ги познавале доволно можностите на новите телекомуникации.