Берлин, 15 април 2011 (МИА) - Британскиот министер за надворешни работи Вилијам Хејг се надева дека некои од сојузниците во НАТО ќе испратат дополнителни борбени авиони за мисијата во Либија, и покрај тоа што одредени држави веќе соопштија дека немаат намера да се вклучат, пренесоа британските медиуми.
-Јас сум охрабрен затоа што несомнено има доста држави кои не ја отфрлија оваа варијанта и можат да ја спроведат, изјави Хејг во кулоарите на средбата на министрите за надворешни работи на земјите членки на НАТО во Берлин.
Генералниот секретар на Алијансата Андерс Фог Расмусен изјави дека командантот на силите на Алијансата во Европа генерал Џејмс Ставридис има потреба само од „уште неколку авиони за прецизни напади врз целите на земја“.
Велика Британија и Франција ги охрабруваат сојузниците од НАТО да дадат уште авиони, откако САД се повлекоа од операциите за нанесување воздушни удари врз режимот на Моамер Гадафи.