Рим, 16 ноември 2011 (МИА) - Мандатарот за состав на новата италијанска влада Марио Монти денеска ќе го претстави новиот кабинет и финансиски план, два дена по разговорите со политичките, бизнис и синдикалните лидери во државата.
Претпладнето ќе има средба со претседателот Џорџо Наполитано за да го извести официјално дека може да формира нова влада.
Монти вчера имаше средба со лидери на политички партии во намера да обезбеди поддршка за формирање на кабинетот кој би ја водел третата по големина економија во еврозоната кон надминување на должничката криза.
Поддршката на Демократската партија и партијата Народ на слободата на Силвио Берлускони е од клучно значење пред гласањето доверба за новата влада кое може да биде одржано оваа недела.
Наполитано го именува 68-годишниот Монти, професор по економија и поранешен еврокомесар за внатрешен пазар, финансиски услуги и царинска и даночна политика (1995-1999) и за конкуренција (1999-2004), за мандатар по оставката на премиерот Силвио Берлускони.