Киев, 20 февруари 2014 (МИА) - Бројот на жртвите во немирите во главниот град на Украина, Киев, се искачи на 35, соопшти Министерството за здравство.
Министерството соопшти за седум загинати денеска, меѓу кои и двајца полицајци. Најмалку 60 луѓе денеска побарале медицинска помош, од кои петмина се примени во болница во тешка здравствена состојба.
Вкупно 505 луѓе побарале медицинска помош од вторникот до денеска, од кои 292 се хоспитализирани.
Западни медиуми тврдат дека само денеска се убиени најмалку 25 цивили.
Лекар од тимот на опозицијата тврди дека денеска снајперист застрелал 13 демонстранти.
Руската телевизија „Раша тудеј“ јави дека група снајперисти зазеле хотел во центарот на Киев и оттаму пукаат врз полицајците.
Според ИТАР-ТАСС по улиците во Киев не се забележува ниту еден полицаец, сообраќајот е хаотичен, метрото не работи, а украинското МВР ги посоветува жителите на Киев да не користат сопствени автомобили и да не ги напуштаат домовите без посебна причина.