Скопје, 29 јуни 2017 (МИА) - Граѓаните 11 години сведочеа што значи целосна партизација на државните институции, каде што од најнизок па до највисок ешалон беа вработувани лица кои од потребните критериуми поседуваа единствено партиска подобност, соопшти СДСМ реагирајќи на обвинувањето на ВМРО-ДПМНЕ дека се назначуваат директори на институции без почитување на законите.
- ВМРО-ДПМНЕ преку неосновани обвинувања со денови создава заблуда кај јавноста, бидејќи станува збор за привремени решенија, односно назначување вршители на должност. Конечните решенија, без разлика за кои личности ќе се работи, ќе бидат според потребните квалификации во согласност со Законот за државни службеници.
СДСМ, преку Владата што ја предводи, започнува процес на департизација и професионализација на институциите. Државните институции ќе работат ефикасно, професионално и во интерес на граѓаните, за никогаш повеќе да не се повтори министерствата да функционираат како партиски штабови, а Македонија да биде квалификувана како заробена држава, како што тоа беше за време на владеењето на ВМРО-ДПМНЕ, наведува СДСМ во реакцијата.
Партијата додава дека за време на 11-годишното владеење на ВМРО-ДПМНЕ се случило целосно поклопување на државата, а меѓу најочигледните примери за тоа, како што наведува, била партизацијата на Министерството за внатрешни работи.
- Според признание на поранешната министерка за внатрешни работи Гордана Јанкуловска, ВМРО-ДПМНЕ го претвори во ВМРО-МВРО, пишува во реакцијата на СДСМ.