Советот за оцена на обвинител акт при Основниот кривичен суд Скопје донесе решение со кое приговорот на одбраната за случајот „Онкологија" се одбива, а актот се одобрува.
Од Крвичен, посочуваат дека станува збор за обвинителниот акт КООА 128/35 кој е за директорот Нино Васев и обвинителен предлог за тројца други лекари, што се однесува за несовесно лекување и тешки дела против здравјето на луѓето.
-По вака одобрениот обвинителен акт формиран е кривично – правен предмет со К.бр. 1069/25 кој согласно АКМИС системот ќе биде распределен на понатамошно постапување кај судија, а што биде насрочен термин за главна расправа, истиот ќе биде достапен на календарот за судења на веб страната на судот, информираат од Основен кривичен суд Скопје.
Од Кривичен, појаснуваат дека другиот обвинителен акт што се однесува на економското работење на Клиниката за Онкологија во кој се опфатени тогашниот директор Нино Васев и организацискиот директор на Клиниката се уште е во оцена и за него, ако се оцени позитивно ќе има друг предмет.
Државниот јавен обвинител Љупчо Коцевски, основниот јавен обвинител на ОЈО Скопје Гаврил Бубевски и предметната обвинителка Ана Гоговска Јакимовска на заедничка прес - конференција на 22 мај годинава информираа дека предметот „Онкологија“ е завршен и поднесени се две обвиненија до Основниот кривичен суд Скопје.
Како што соопшти предметната јавна обвинителка, предметот е поделен на два дела – првиот се однесува на економското работење на Клиниката за Онкологија во кој се опфатени тогашниот директор и организацискиот директор на Клиниката и вториот дел од предметот се однесува на третманот на пациентите и опфаќа четворица лекари онколози.