Постојат индиции пожарот кој во неделата околу попладне избувна на магистралниот пат од Скопје кон граничниот премин Блаце да е подметнат, вели директорот на Дирекцијата за заштита и спасување (ДЗС) Стојанче Ангелов.
Тој посочува дека изутрината пожарникарите на местото каде што настанал пожарот пронашле дрвени палети за кои треба да се утврди дали биле прелиени со бензин и фрлени во смреки.
Додаде дека на местото на избувнувањето на пожарот бил присутен 15, 20 минути по неговото избувнување и можел да види дека линијата на огнот е многу широка како за пожар кој би се појавил од фрлен опушок од цигара.
-Денес утрово додека пожарникарите работеа на неговото доизгаснување, бидејќи овој пожар е под целосна контрола во овој момент, најдоа на неколку места дрвени палети , претходно најверојатно намачкани или прелиени со бензин и фрлени во смреки. Некој намерно утрово се обидуваше да го реактивира овој пожар којшто сеуште е под контрола, вели Ангелов.
Тој упати апел до граѓаните доколку забележат сомнително однесување, особено луѓе коишто носат со нив дрвени палети во возило или во рака, истото веднаш да го пријават на бројот 112.
-Воедно не е точна веста дека во текот на вчерашниот ден некој манастир или црква биле во непосредна опасност од пожарот. Исто така не е точна веста дека изгореле три куќи од село Чучер, нагласува Ангелов.
Додава дека во текот на вчерашниот ден не дозволиле да изгори ниту една куќа, благодарение на храбрата реакција на скопските пожарникари, пилотите на Полицијата на Армијата, но и на локалното население.