Скопје, 10 мај 2010 (МИА) - Утрешното преземање на претседателствувањето со Советот на Европа, за Република Македонија е исклучително значаен настан во надворешната политика оваа година и можност за промоција, остварување одредени стратегии, но и унапредување на имиџот на земјата, смета премиерот Никола Груевски.
- Претседателствувањето со Советот на Европа е добра шанса за Македонија, за промоција за остварување на одредени стратегии и цели кои се поврзани со претседателството. Се надевам и цврсто верувам дека ќе имаме одлично претседателство, дека ќе оставиме одличен впечаток и ќе бидеме пример за сите понатаму кои ќе претседателствуваат со оваа институција. Настанот ќе биде искористен и за подобрување на имиџот на Република Македонија, изјави премиерот Груевски по денешното поставување камен темелник на тениски игралишта во општина Ѓорче Петров.
Тој додаде дека темите ќе бидат фокусирани на човековите права улогата и учеството на младите во политичкиот и демократскиот живот.
- Ќе бидат организирани голем број конференции, тркалезни маси и други настани кои треба да дадат придонес во реализацијата на идеите, рече македонскиот премиер.
Одговарајќи на новинарско прашање тој истакна дека изјавата на министерот Антонио Милошовски оти може да се случи Македонија да не добие датум за почеток на преговори за членство во Унијата за време на шпанското претседателство, не значи дека Македонија се оддалечува од решение за спорот за името, кое се наметна како услов за членство во Унијата.
Република Македонија утре го презема претседавањето со Комитетот на министри на Советот на Европа. Претседавањето што се одвива по ротирачки редослед Македонија го наследува од Швајцарија, а по шест месеци ќе и го предаде на Турција.
Официјалното преземањето на претседавањето ќе се случи за време на 120. сесија на Комитетот на министри на СЕ, во седиштето на оваа меѓународна организација во Стразбур. Преземањето на претседателството е осма точка на дневниот ред на седницата.