Проектот „Модел за ефикасна комуникација меѓу Комисиите за односи со заедниците и граѓаните“ ќе се спроведува во четири општини

Скопје, 16 јуни 2010 (МИА) - Градоначалниците на општините Дебар, Гостивар, Тетово и Чаир денеска потпишаа меморандум преку кој ќе го реализираат проектот „Модел за ефикасна комуникација меѓу Комисиите за односи со заедниците и граѓаните“ што го спроведува Фондацијата „Метаморфозис“ и Здружението на граѓани „Заеднички вредности“.

Идејата, како што истакна Филип Стојановски од „Метаморфозис“, е да се овозможи поголема видливост над Комисиите за односи со заедниците и граѓаните, а општините да придеонесат за интеракција со граѓаните.

- Ќе се овозможи комуникација, односно извесување на граѓаните преку интернет, а ќе се организира и средби меѓу Комисиите и граѓаните, каде граѓаните ќе имаат можност да комуницираат со Комисиите и со општинската администрација и ќе создадат подобра слика за проблемите со кои се соочуваат граѓаните, изјави Стојановски.

Целта на проектот, според Хајрие Ахмед од „Заеднички вредности“, е подобрување на меѓуетничките односи и јакнење не институциите на системот за зајакнување на демократијата во Македонија и забрзување на процесот на пристапување во ЕУ.

- Во конкретните цели на проектот спаѓа подобрување на капацитетите на членовите на Комисиите за односи со заедниците со цел да станат поефикасни, да се зголеми нивната видливост и способноста за работа во рамките на нивните законски одредени надлежности, преку употребата на нови технологии, рече Ахмед.

Проектот „Модел за ефикасна комуникација меѓу Комисиите за односи со заедниците и граѓаните“ е финансиран од Европската унија и од организациите што го спроведуваат  „Метаморфозис“ и „Заеднички вредности“.