Вашингтон, 23 ноември 2016 (МИА) - Истакнати компјутерски експерти го повикаа изборниот тим на Хилари Клинтон да ги оспори резултатите од изборите во државите Висконсин, Мичиген и Пенсилванија, јави Си-Ен-Ен.
Тие сметаат дека дошле до докази оти со гласовите во овие три држави е манипулирано или дека тие се хакирани.
Овие сомнежи, како што наведуваат, минатиот четврток им биле соопштени на советниците на Хилари Клинтон.
Меѓу овие експерти е и Алекс Халдерман, директор на Центарот за компјутерска безбедност на Универзитетот во Мичиген, кој изјави дека сомнежите произлегуваат од трендот на полоши резулатите на Хилари Клинтон во областите каде што е користен електронски систем на гласање, во споредба со реоните каде гласањето било со гласачки ливчиња.
Во окрузите каде се гласало со заокружување на имињата на кандидатите на хартија Хилари Клинтон добила дури седум отсто повеќе гласови отколку во окрузите каде се гласало преку електронски машини за гласање.
Експертите процениле дека Клинтон на тој начин во Мичиген „останала покуса“ за 30.000 гласови, а со самото тоа и за победа, бидејќи во конечниот резултат имаше 27.000 гласови помалку од Трамп, пишува магазинот „Њујорк“.