Објавен оглас за јавно наддавање за продажба на државното земјиште за проектот „Сончев град“

Скопје, 5 април (МИА) - Во домашните печатени медиуми и меѓународниот дневен весник Financial Times денеска е  објавен оглас за јавно наддавање за продажба на градежно државно земјиште на локалитетот „Сончев град“ во село Сопиште, предвидено за изградба на модерна, урбана и еколошка резиденцијална  населба со највисоки стандарди.

Проектот „Сончев град“ денеска на прес-конференција ќе го презентираат премиерот Никола Груевски и министрите за транспорт и врски и за странски инвестиции Миле Јанакиески и Веле Самак.

Вкупната површина на земјиштето кое е предмет на продажба изнесува 636.459, 48 метри квадратни. Јавното наддавање се однесува на целата површина односно не може да се учествува за поединечни парцели.

Предмет на јавното наддавање се 603 градежни парцели со намена за семејно домување, со површина од 563.186,29 метри квадратни, 11 градежни парцели со намена за домување -терасести структури со површина од 48.481,43 метри квадратни и две градежни парцели за изградба на спортски терени, со површина од 24.809,75 метри квадратни.

Заинтерсираните физички и правни лица за учество на јавното наддавње треба да поседуваат и до Комисијата за јавно наддавање да достават референтна листа за веќе изградени објекти од таков тип и обем, да достават докази за техничка способност на понудувачот, да имаат миниум 1.500 вработени лица, што ќе го докажат со листа за исплатени плати. Заинтерсираните за јавното наддавње треба да имаат годишен обрт на капитал од најмалку 100 милиони евра и да приложат банкарска гаранција  во износ од три милиони евра издадена од реномирана банка со добра класификација и со најмалку „Б“ кредитен рејтинг.