Женева, 20 ноември (МИА) - Новиот грип од типот А (H1N1) досега однесе 6.750 животи, а 500 заболени починале за само една недела, соопшти денеска Светската здравствена организација.
Бројот на починатите од новиот грип, кој се појави во периодот март-април, се зголеми до 6.750 на 15 ноември во 206 држави и територии, нагласи СЗО.
Северна Америка и натаму е најзасегната со над 4.806 смртни случаи, а по неа се Азиско-пацифичкиот регион со 1.323 починати и Европа со 350 жртви.
- Пренесувањето на грипот е активно и на голема територија на САД, додека во определени региони болеста ја достигна својата кулминација, со исклучок на североисточниот дел на САД, се наведува во извештајот на СЗО.
Во Европа грипот е особено активен во северниот, источниот и југоисточниот дел на континентот.
Грипот достигна кулминација во Исланд, Ирска, Велика Британија и Белгија, а забрзан раст на нови случаи има во Србија, Молдавија, Норвешка, Литванија, Грузија, Белорусија, Бугарија, Романија и Украина.