Кабул, 25 ноември (МИА) - Американскиот претседател Барак Обама денеска изјави дека има намера да „ја заврши работата“ во Авганистан, почната пред осум години и дека уништувањето на терористите на Ал Каеда и неговите екстремистички сојузници и натаму е клучен интерес за САД.
-Ќе ги демонтираме и намалиме нивните капацитети и на крајот целосно ќе ги уништиме нивните мрежи. Мојата намера е по осум годни да ја завршам работата, иако во текот на овие години повремено немавме ниту доволно средства, ниту адекватна стратегија, порача Обама.
Обама вети дека долго очекуваната одлука за испраќање дополнително воено засилување во оваа земја ќе ја соопшти по Денот на благодарноста, кој годинава во САД се одбележува на 26 ноември, јавија агенциите.
-Уверен сум дека американските граѓани ќе ја поддржат мојата одлука, кога ќе ги слушнат јасните аргументи за тоа што таму работиме и како мислиме да ги оствариме нашите цели, рече Обама.
Би Би Си објави дека Обама планира својата одлука за испраќање засилување во Авганистан да ја соопшти идниот вторник, кога треба да одржи говор до нацијата.