Триполи, 15 мај 2010 (МИА) - Деветгодишното момче од Холандија, единствениот преживеан патник во авионската несреќа во Либија во која загинаа 103 лица, денеска е испратен со медицински транспортен авион во својата земја.
Неколку часа пред заминувањето на момчето му е соопштено дека меѓу загинатите во авионската несреќа се наоѓаат и неговите родители и две години постариот брат.
Докторот Садиг Бангала изјави дека момчето Рубен ван Асоу закрепнува доволно добро за да може да биде префрлен во Холандија.
Поради големиот број скршеници на двете нозе врз Рубен е извршена операција која траела четири и пол часа, а според докторот Бенгала за неговото преживување придонеле многу фактори, вклучувајќи го и местото на кое седел во авионот.
Авионот од типот „Ербас 330-200“ на либиската авиокомпанија „Африкија ервејз“, кој тргна од Јоханесбург, се урна во средата при слетувањето на аеродромот во Триполи.
Повеќето од две третини од патниците кои загинаа биле холандски туристи, а меѓу жртвите во несреќата се и патници од Либија, Јужна Африка, Белгија, Австрија, Германија, Франција, Зимбабве и Велика Британија.