Сана, 21 февруари 2011 (МИА) - Илјадници луѓе се собраа утрово на протест пред заградата на Универзитетот во Сана, барајќи смена на режимот во Јемен.
Студенти, пратеници на опозицијата и активисти започнаа да пристигнуваат во текот на минатата ноќ на плоштадот „Тахрир“, кој е преименуван од демонстрантите по египетските немири.
Насобраниот народ извикуваше пароли „Народот сака соборување на режимот“ и „Народот сака промени“.
Парламентарната опозиција во Јемен вчера одлучи да им се приклучи на протестите против управувањето на претседателот Али Абдула Салех, во кој учествуваа главно студенти.
Безбедносните сили беа распоредени околу плоштадот, но не се обидоа да ги растераат демонстрантите. Досегашните секојдневни антивладини протести во Сана, кои започнаа пред десетина дена, беа грубо задушувани од приврзаниците на власта, вооружени со стапови, камења и ладно оружје. Полицијата вчера првпат ги држеше настрана од студентите.
- Барањата за смена на режимот се апсолутно неприфатливи, а сегашните настани во земјата наликуваат на болест, изјави денеска шефот на државата Салех.
За време на протестите во Јемен досега загинаа седум лица. Освен во Сана протести се одржуваа и во други градови, а низ централните улици на Аден веќе се движат тенкови и оклопни возила.