Триполи, 18 март 2011 (МИА) - Либиските власти ја отфрлија резолуцијата на Советот за безбедност на ОН, која синоќа беше усвоена.
Според портпаролот на либиското Министерство за надворешни работи Халед Каим резолуцијата 1973 „претставува закана за единството на земјата“.
- Оваа резолуција ја одразува агресивната позиција на меѓународната заедница, истакна Каим, осудувајќи ја „желбата на Франција, Велика Британија и САДЕ да ја поделат Либија“.
Тој нагласи дека и покрај тоа Либија е подготвена да објави примирје во дејствата против бунтовниците, настојувајќи претходно детално да се разговара околу тоа. Најверојатно за таа цел ќе биде ангажиран и посредник.
- Либија ќе реагира позитивно на резолуцијата на ОН, со цел да ја докажеме нашата желба за гарантирање безбедност на цивилното население, додаде Каим.