Зголемено ниво на радијација е откриено во јапонските префектури Фукушима и Ибараки во близина на нуклеарната централа, каде се случи хаварија по катастрофалниот земјотрес од 11 март, соопшти владиниот портпарол Јокио Едано.
Меѓународната агенција за атомска енергија соопшти дека јапонските власти му препорачале на народот кој живее во близина на централана да користи јод, кој може да се употребува како превентивна мерка против рак на тироидната жлезда во случај на изложеност на радијација при нуклеарен инцидент.
Во меѓувреме, американските власти потврдија дека минимални количини радијација се регистрирани во Сакраменто во Калифорнија, но оти во САД никаде не е откриено ниво на зрачење кое би предизвикало загриженост.
Американската Агенција за заштита на животната средина и Секретаријатот за енергија вчера соопштија дека радијацијата во Сакраменто потекнува од хаваријата на јапонската нуклеарна централа Фукушима-Даичи.