Техеран, 10 мај 2011 (МИА) - Иранскиот министер за разузнавање Хајдар Мослехи изјави дека Техеран има докази за тоа дека лидерот на Ал Каеда Осама бин Ладен умрел од болест многу порано од акцијата на американските специјални сили во која беше убиен.
- Ние располагаме со прецизни информации дека Бин Ладен е починат од болест пред некое време, изјави Мослехи.
Доколку американската војска и разузнавачките сили навистина го уапсиле или убиле Бин Ладен, зошто не го покажаа, зошто неговото тело го фрлија во море, запраша Мослехи.
Бин Ладен е убиен на 2 мај во пакистанскиот град Аботабад, северно од главниот град Исламабад, во акција на американските специјални сили.
Лидерот на Ал Каеда беше погребан во море нешто помалку од 24 часа по завршување на акцијата, а според изјавите на американските официјални лица со ДНК анализа е потврден неговиот идентитет.