Лондон,10 мај 2011 (МИА) - САД имале постигнато согласност со пакистанските власти за да може унилатерално да дејствуваат внатре на територијата на Пакистан, доколку занаат дека Осама бин Ладен се крие во земјата, пишува „Гардијан“, повикувајќи се на американски и пакистански извори.
Како што јави дописникот на МИА од Лондон, договорот е постигнат во тајност, уште пред речиси десет години, меѓу тогашниот пакистански претседател Превез Мушараф и поранешниот американски претседател Џорџ Буш, откако Бин Ладен успеа да побегне пред војниците на САД, по воената интервенција во планинскиот масив Тора Бора, пред крајот на 2001 година.
Во тајниот документ договорен меѓу двете земји, е предвидено правото на унилатерална воена интервенција да се однесува не само за Бин Ладен, туку и за вториот човек на Ал Каеда Ајман ал-Завахри, како и за неименуваната трета личност по значење во хиерархијата на оваа терористичката мрежа. Според лондонскиот весник, САД и Пакистан се согласиле пакистанските власти да реагираат бучно и нервозно и да ја осудат постапката на Американците, но да не направат ништо за да се прекине операцијата.
Откритието за постоењето на таен американско-пакистански договор околу Бин Ладен, се случува во време кога властите во Исламабад реагираа остро на американската интервенција во Аботабад, оддалечен помалку од стотина километри од главниот град на земјата, незадоволни што не биле известени, како и оправдувајќи се дека нивното разузнавање и тамошната Влада не занеле ништо за тоа дека Бин Ладен речиси седум години мирно живее стотина метри од главната воена академија во Пакистан.
Американците и Пакистан сега настојуваат да се спогодат околу тоа, за семејството на Бин Ладен, кои се во пакистански затвор, но Пакистанците категорично се против таквото барање.