Виена, 13 мај 2011 (МИА) - Поранешен генерал на НАТО, Клаус Рајнхарт оцени денеска дека воената стратегија на Алијансата во Либија е погрешна.
- Целиот пристап и целата стратегија се погрешни, бидејќи не може конфликт на земја да се заврши од воздух, изјави тој за австриското радио Ое1.
Во текот на 90-те на Балканот се виде дека интервенцијата на западната алијанса може само да направи услови за примирје, објасни тој.
- Главна грешка е да се каже оти Гадафи мора да биде тргнат, критикуваше Рајнхарт, додавајќи дека се водени и преговори со поранешниот претседател на СРЈ Слободан Милошевиќ.
Тој вели дека сега треба да се изврши притисок врз бунтовниците, за да прифатат примирје и потоа преговори.
- По завршувањето на судирот, ЕУ има задача заедно со ОН да упатат посредници и преземат преговори, објасни Рајнхарт. Тој смета дека доколку се случи примирје, неопходна е „тампон-зона“ меѓу страните во конфликтот под надзор на меѓународни сили за заштита.