Либискиот лидер Моамер Гадафи изјави во аудио-обраќање емитувано од либиската телевизија дека е жив и оти се наоѓа на локација, која е недостапна за НАТО.
- Им кажувам на плашливите крстоносци дека се наоѓам на место, каде не можат да ме најдат и убијат. Јас живеам во срцата на милиони, истакна Гадафи. Кусата аудио-порака објавена од Ал Џамахирија не беше придружена од видеоматеријал.
Гадафи исто така напомена оти ја дал оваа изјава, откако добил голем број телефонски повици од Либијци, кои биле загрижени за неговата состојба, по завчерашното бомбардирање на НАТО силите на неговата резиденцијата во елитниот кварт Баб ал Азизија во Триполи.
Италијанскиот министер за надворешни работи Франко Фратини изјави вчера дека Моамер Гадафи можеби избегал од Триполи и најверојатно е ранет.
Фратини истакна дека верува на зборовите на католичкиот епископ во либиската престолнина Џовани Мартинели, според кого „Гафади најверојатно не е во Триполи и може дури е и ранет“ во воздушни напади на НАТО.
Тој во интервју за весникот „Кориере дела сера“ изјави дека „меѓународниот притисок веројатно го натерал Гадафи да реши да побара прибежиште на побезбедно место“.
Либиски владин портпарол го демантираше тврдењето дека Гадафи е ранет.
Се очекува Гадафи да биде меѓу тројцата либиски претставници, за кои Меѓународниот кривичен суд планира да издаде наредба за апсење в понеделник.