Куала Лумпур, 22 март 2014 (МИА) - Кинески сателит воочил голем пловечки објект во јужниот Индиски Океан, кој би можел да биде трупот на авионот на „Малезија ерлајнс“.
Сомнителниот предмет, регистриран од кинескиот сателит, плови на 120 километри од можните останки од исчезнатиот малезиски авион, за кои Австралија веќе соопшти.
Предметот се наоѓа во јужниот коридор, по кој најверојатно се движел изчезнатиот авион пред повеќе од две седмици. Предметот бил забележан на 18 март, два дена откако Австралија соопшти дека регистрирала преку сателит големи објекти, кои може да се остатоци од авион.
Авионот исчезна на летот од Куала Лумпур до Пекинг.
Малезискиот министер за одбрана Хишамудин Хусеин изјави денеска дека добил информации дека кинескиот сателит снимил објект со димензии 22 на 13 метри.
- Штотуку ја примив веста дека кинескиот амбасадор добил сателитска снимка на пловечкиот објект на јужниот коридор и Кинезите ќе испратат бродови тоа да го проверат, рече тој.
Засега нема други детали, а малезискиот министер очекува дека кинеските власти за неколку часа ќе објават дополнителни информации.
Авионот Боинг 777 на летот MH370, во кој се наоѓале 239 патници, изгубил контакт со контролата на летот еден час по полетувањето од Куала Лумпур на 8 март.