Македонската репрезентација до 21 година денеска го има првиот собир спроти квалификацискиот натпревар против Северна Ирска што треба да го игра на 13 октомври на гостински терен.
Еден од предводниците на младата репрезентација, Давид Бабунски смета дека победата против Украина е многу значајна за самодовербата во тимот и притисокот за добар резултат.
- Среќен сум што повторно сме заедно во репрезентацијата. Имаме одлична екипа, добри фудбалери и самодоверба пред дуелот со Северна Ирска. За тимот е многу значајна победата на последниот натпревар против Украина, ќе се обидеме заеднички да оствариме нов успех. Овие неколку денови ќе ги искористиме целосно да се посветиме на репрезентативните обврски и максимално да ги следиме и исполнуваме насоките кои ги добиваме од стручниот штаб. Во Северна Ирска патуваме со една цел, да победиме и да го потврдиме квалитетот и сплотеноста која ја имаме во тимот,вели Бабунски.
Македонија предводена од селекторот Благоја Милевски попладне во 16:30 часот на тренинг центарот „Петар Милошевски“ ќе ја одработи првата од предвидените четири тренинг сесии во Скопје.