Шпанската Ла Лига пријави до надлежните власти обид за местење фудбалски натпревар, откако поранешниот играч на Жирона, Адај Бенитез, обелодени дека му биле понудени пари неговиот тим да загуби.
Ла Лига го пријави случајот откако Бенитез гостувајќи во спортска емисија рече дека му биле понудени 50.000 евра Жирона да загуби натпревар на крајот на сезоната 2016/17.
Бенитез рече дека тоа не го прифатил, но не откри други детали за тоа кој му понудил пари.
Минатиот месец шпанската полиција уапси шест лица поради нивна наводна вмешаност во план да го наместат резултатот на натпревар од Купот на кралот во 2021 година. Натпреварот кој беше под истрага е победата на Леванте над нисколигашот Хуракан Мелил од 8-0.