Ѕвездата на Голден Стејт Вориорс, Стеф Кари, ќе отсуствува најмалку една недела поради истегнување од прв степен на левата тетива, објави „ЕСПН“.
Датумот на враќање на Кари на теренот ќе зависи од тоа како кошаркарот ќе реагира на рехабилитацијата.
Еднонеделното отсуство ќе го остави Стеф Кари надвор од терените до следната среда и евентуалниот петти натпревар од полуфиналната серија на Западната конференција во Националната кошаркарска асоцијација на САД и Канада (НБА) против Минесота Тимбервулвс во Минеаполис, доколку дојде до неа. Доколку има шести меч, тој ќе се игра на 18 мај во Сан Франциско.
Кари се повреди додека шутираше од средна дистанца во втората четвртина од победата на Вориорс над Минесота со 99-88 во првиот натпревар од серијата во вторникот во Минеаполис. Двократниот најкорисен играч во НБА и 11-кратен учесник во НБА Ол-стар натпреварот веднаш посегна по левата нога и им сигнализираше на клупата дека треба да го напушти теренот.
Стеф Кари (37), имаше просек од 24,0 поени, 5,9 скока и 5,7 асистенции во првото коло од плејофот против Хјустон Рокетс и им помогна на „воините“ да го совладаат ривалот во серија од седум натпревари.