Извршниот директор на Баер Леверкузен, Фернандо Каро, ги негираше информациите дека плејмејкерот на „аспирините“, Флоријан Вирц, се согласил да се приклучи на шампионот на Бундеслигата, Баерн Минхен.
-Знам дека ова не е вистина и досадно е да се читаат статии што не се вистинити, изјави Каро за „РТЛ“.
Тој исто така рече дека клубот има добри односи со Вирц и неговите родители, а неговиот татко е и негов агент.
-Секако, Флоријан мора да размисли за својата иднина, но барем засега, не знаеме за никаква негова одлука. Тоа е вистината, додаде Фернандо Каро на темата.
Весникот „Билд“ веќе објави дека германскиот репрезентативец се согласил да се приклучи на Баерн ова или следното лето за 100 милиони евра.
Играчот од средниот ред има договор со „аспирините“ до летото 2027 година, а за него е заинтересиран и Манчестер Сити. Менаџерот на „небесно сините“, Пеп Гвардиола, го сака Вирц како замена за Кевин де Бруин, кој го напушта Сити.
Семејството на Флоријан Вирц отпатува во Манчестер во вторникот, но засега нема коментари за тоа што било договорено на англиска почва.