Босанската гол-машина Един Џеко потпиша преддоговор со италијанскиот гигант, Милан, соопштуваат медиумите од Италија. Сега останува уште управата на "росонерите" да се договори со германскиот шампион Волфсбург околу отштетата со што трансферот би бил официјализиран. Ова го потврди и потпретседателот Адријано Галијани кој лично се сретнал со Џеко и кој го убедил да го потпише овој договор.
Германците воопшто не сакаа да го продаваат својот најдобар напаѓач, меѓутоа Џеко немаше срце да го одбие големиот Милан, со што го стави во многу незгодна позиција својот сегашен клуб. Германците не сакаат да се разделат со него за помала сума од 30 милиони евра, додека пак од Милан се подготвени да "искешираат" само 20. Сепак управата на Милан ќе се обиде повторно да си ја проба среќата и ќе влезе во нови преговори со "волците" веќе од следната недела.
Италијанскиот гигант се обидува да донесе квалитетни засилувања бидејќи по продажбата на Кака и најавените неколку заминувања, тимот драстично ослабе. Тренерот Леонардо истакна дека Андреа Пирло и Алесандро Пато нема да бидат продадени и покрај интересот на Челзи и Карло Анчелоти.